د عامې روغتیا وزارت د مرکزي ریاستونو او امریتونو د تېرې میاشتې فعالیتونو او لاسته راوړنو د ارزونې غونډه ترسره شوه
په دې غونډه کې د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني، د وزارت مرکزي رئیسانو او امرینو ګډون کړی و.
د روغتیایي خدمتونو وړاندې کولو مرستیال، د یادو ادارو د فعالیتونو ارزونې د اهمیت په اړه خبرې وکړې او د روغتیایي خدمتونو په ښه والي یې ټینګار وکړ.
دغه راز مرکزي رئیسانو، په بېلا بېلو برخو (لومړنیو روغتیايي خدمتونو، واکسیناسیون، روغتیايي مرکزونو تجهیز او د روغتیا عامه پوهاوي برنامو) کې د شویو پرمختګونو په اړه خپل کاري راپورونه وړاندې کړل.
د روغتیایي خدمتونو وړاندې کولو مرستیال، د اړوندو مسؤلینو کاري راپورونو د اورېدو ترڅنګ ژمنه وکړه، چې د عامې روغتیا وزارت رهبري به د ننګونو په حل کې له هېڅ ډول هڅو درېغ ونه کړي.
ښاغلي مرستیال همداراز، د ننګونو د حل لپاره د اړوندو برخو مسؤلینو ته اړینې لارښوونې وکړې او د روغتیايي خدمتونو وړاندې کولو بهیر په ښه والي او د بېلا بېلو برخو ترمنځ د همکارۍ پر پیاوړتیا یې ټینګار وکړ.
