د عامې روغتیا وزارت د مالي او اداري چارو مرستیال، ښاغلي قاري عبدالولي صدیقي د الټراساونډ برخې له استادانو سره ناسته تر سره کړه
دا ناسته چې د عامې روغتیا وزارت د اکمال تخصص لوی ریاست او تشخیصیه ریاست د الټراساونډ بورډ د استادانو په همکارۍ ترسره شوه، په کې د مالي او اداري چارو مرستیال، د اکمال تخصص لوی رئیس ډاکټر نثار احمد نیازي او د دولتي او خصوصي سکتور د الټراساونډ برخې استادانو ګډون کړی و.
په دې ناسته کې د الټراسونډ برخې پر مسلکي زده کړو، د غير قانوني الټراساونډ مرکزونو مخنیوي، د خدمتونو د کیفیت ښه والی او د خصوصي سکتور او عامې روغتیا وزارت ترمنځ د لا زیاتې همغږۍ په اړه بحث او خبرې وشوې.
د مالي او اداري چارو مرستیال د الټراساونډ برخې د تدریس له امله له استادانو څخه مننه وکړه او ویې ویل:( د الټراساونډ برخه ښه پرمختګونه لري او موږ هڅه کوو، چې د عامې روغتیا وزارت د راډیولوژۍ انسټیټیوټ کې د الټراساونډ برخې په فعالولو سره ډاکټرانو ته نورې مسلکي او پرمختللې اسانتیاوې هم برابرې کړو؛ څو په دې برخه کې ناروغانو ته معياري خدمات وړاندې شي).
ټاکل شوې ده، چې په نږدې راتلونکي کې د عامې روغتیا وزارت په راډیولوژۍ انسټېټیوټ کې د الټراساونډ په برخه کې د یو کلن روزنیز پروګرام لومړی پړاو د لرو پرتو او محرومو ولایتونو د ۷۵ تنو ډاکټرانو لپاره پیل شي، په دې پروګرام کې به د دولتي او خصوصي سکتور مسلکي استادان ګډونوالو ته تدریس کوي.
