د عامې روغتیا وزارت د روغتیايي پراختیا او پالیسۍ مرستیال، ښاغلي ډاکټر محمد حسن غیاثي د مرکزي پولي کلینیک څخه لیدنه تر سره کړه
په دې لیدنه کې چې د تخصصي او ثالثي روغتونونو رئیس، ډاکټر امین الله مومند یې هم ملتیا کوله، د روغتیايي پراختیا او پالیسۍ مرستیال د مرکزي پولي کلینیک له مسؤلینو سره په ګډه د روغتیایي خدمتونو وړاندې کولو بهیر او د روغتیایي کارکوونکو له لوري مراجعینو سره د چلند څرنګوالی ولید او د دې مرکز د بېلابېلو برخو څخه د لیدنې ترڅنګ یې د روغتیایي کارکوونکو د فعالیتونو ستاینه وکړه، د هغوی ستونزې یې واورېدې او د حل ژمنه یې وکړه.
همداراز، په دې لیدنه کې د موجوده تجربو او اسانتیاوو په پام کې نیولو سره د مرکزي پولي کلینیک تر چتر لاندې د عامه او خصوصي مشارکت له لارې روغتیايي خدمتونو ته د لا زیات لاسرسي په موخه د کابل ښار په نورو برخو کې د ورته روغتیایي مرکزونو په جوړولو هر اړخیز بحثونه وشول.
