د عامې روغتیا وزارت د خوړو او درملو معینیت له لوري ۳۵ تنو کوچنیو متشبثینو ته د "خوړو ککړتیا او مخنیوي" تر عنوان لاندې درې ورځنی روزنیز سیمنار تر سره شو
یاد روزنیز سیمنار چې د روغتیا نړیوال سازمان په همکارۍ ترسره شو، موخه یې ذهنیت جوړونه، د خوړو ککړتیا او مخنیوي برخه کې د عامه پوهاوي کچې لوړول، د روغتیايي او تولیدي مهارتونو ښه والی او د هغو خطرونو را سپړنه ده، چې کوچنیو متشبثینو ته متوجه دي.
په یاد روزنیز سیمنار کې ګډونوالو ته د خوړو ککړتیا د ډولونو، د خوړو خوندیتوب، فردي او چاپېریالي حفظ الصحې، د خوړو له لارې د انتقالېدونکو ناروغیو او د خوراکي توکو د سمې کارونې په اړه هر اړخیز معلومات وړاندې شول.
په پای کې ګډونوالو ته په دغه سیمنار کې د فعال ګډون او تشویق په موخه ستاینلیکونه ورکړل شول.
