د روغتیايي پراختیا او پالیسۍ مرستیال په خپل کاري دفتر کې (WHO) د روغتیا نړیوال سازمان او (IOM) د کډوالۍ نړیوال سازمان له استازو سره وکتل
د عامې روغتیا وزارت د روغتیايي پراختیا او پالیسۍ مرستیال، ښاغلي ډاکټر محمد حسن غیاثي په خپل کاري دفتر کې (WHO) د روغتیا نړیوال سازمان او (IOM) د کډوالۍ نړیوال سازمان له استازو سره د هېواد په سرحدي سیمو کې د ساري ناروغیو د مخنیوي او په کور دننه هېوادوالو ته د روغتیايي خدمتونو وړاندې کولو په موخه لیدنه ترسره کړه
په دې لیدنه کې دواړو لورو د ساري ناروغیو په ځانګړي توګه د بیزو تڼاکې (مانکي پاکس) ناروغۍ د مخنیوي او پېښو ته یې د رسېدنې، د لرې پرتو او سرحدي سیمو اړمنو هېوادوالو ته د روغتیايي خدمتونو وړاندې کېدو پر څرنګوالي او ورته نورو موضوعاتو خبرې ترسره کړې، چې د روغتیا نړیوال سازمان او کډوالۍ نړیوال سازمان استازو له لوري په دې برخو کې د همکارۍ ژمنه وشوه.
د یادونې وړ ده، چې د افغانستان اسلامې امارت رهبري او د عامې روغتیا وزارت ژمن دي، څو په هېواد کې د ساري ناروغیو د کنټرول او مخنیوي په موخه د لازمو تدابیرو په پام کې نیولو او په کور دننه د شته امکاناتو په ګټې اخیستنې سره لازم اقدامات ترسره کړي، چې په دې برخه کې هڅې روانې دي.
