د روغتیايي خدمتونو مرستیال د سپېرې ولسوالۍ د روغتون د جوړېدو ځایونه وارزول
د ا.ا.ا د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني او مل پلاوي خوست ته د سفر پرمهال د یاد ولایت سپېرې ولسوالۍ کې د جوړېدونکي عمومي روغتون (GH) لپاره د ټاکل شویو ځایونو څخه لیدنه ترسره کړه
په یاده لیدنه کې د عامې روغتیا وزارت مرکزي رئیسانو، د خوست د عامې روغتیا رئیس ډاکټر احمد مجاهد، د سپیرې ولسوال او قومي مشرانو ګډون کړی.
د روغتیايي خدمتونو وړاندې کولو مرستیال، ښاغلي مولوي عبدالولي حقاني وویل: (د عامې روغتیا وزارت له لوري د جوړېدونکي عمومي روغتون (GH) لپاره د یادې ولسوالۍ اوسېدونکو دوه ځایونه انتخاب کړي، چې د تخنیکي ټیم له ارزونې وروسته به یو ځای وټاکل شي او په کې به د روغتون د جوړېدو چارې پیل شي).
ښاغلي مرستیال، زیاته کړه چې د یاد روغتون په جوړېدو سره به د سپېرې ولسوالۍ د اوسېدونکو روغتیايي ستونزې حل او په دې برخه کې به ورته ګڼې اسانتیاوې رامنځته شي.
