د افغانستان اسلامي امارت د عامې روغتيا وزير، ښاغلي ډاکټر قلندر عباد په خپل کاري دفتر کې د نورستان له والي قاري زين العابدين سره لیدنه ترسره کړه
په دې لیدنه کې په نورستان ولایت کې د دې ولایت اوسېدونکو ته د روغتیايي خدمتونو پر وړاندې کېدو، د لرې پرتو سیمو اوسېدونکو ته د روغتیايي خدماتو په رسولو او په دې ولایت کې د روغتیا په برخه د ستونزو د حل په موخه بحث او خبرې ترسره شوې.
د عامې روغتیا وزیر، ښاغلي داکټر قلندر عباد لرې پرتو سیمو ته د روغتیايي خدمتونو رسول له خپلو لومړیتوبونو وباله او ویې ویل، چې په همدې موخه په دې وروستیو کې نورستان ولایت ته هم ځانګړې پاملرنه شوې او ګڼ شمېرروغتیايي مرکزونه په کې جوړ شوې او لا هم یاده لړۍ دوام لري.
د عامې روغتیا وزیر همداراز زیاته کړه، چې په راتلونکي کال کې به د نورستان د ولایتي روغتون ودانۍ د جوړېدو چارې بشپړې شي، چې ولسونو ته به کې اساسي او غوره روغتیايي خدمتونه وړاندې کیږي.
