د ا.ا.ا د عامې روغتیا وزیر ښاغلي، مولوي نور جلال جلالي په خپل کاري دفتر کې د افغانستان لپاره د بې سرحده ډاکټرانو بنسټ له مشر میکایل لیپي سره لیدنه ترسره کړه
په دې لیدنه کې چې د افغانستان لپاره د بې سرحده ډاکټرانو مشر او استازو یې ګډون کړی و، په هېواد کې د بې سرحده ډاکټرانو اړوند روغتیایي مرکزونو او روغتیايي خدمتونو د لا ښه والي، د روغتیایي کارکوونکو د ظرفیت لوړولو، په خدماتو کې روڼتیا، د عامې روغتیا وزارت سره پر لا ښې همغږۍ او د داومداره مؤثرو خدماتو په اړه خبرې وشوې.
ښاغلي وزیر له روغتیایي سکټور سره د یادې ټولنې لخوا د مرستو زیاتوالی او پراختیا اړینه وګڼله او په دې برخه کې یې د خدماتو د لا پراختیا غوښتنې ترڅنګ، د روغتیایي کارکوونکو پر ظرفیت لوړونې، د خدماتو پر کیفیت، مؤثریت او شفافیت ټینګار وکړ.
دغه راز، په یاده لیدنه کې د بې سرحده ډاکټرانو مشر ښاغلي میکایل لیپي هم په افغانستان کې د روغتیايي خدمتونو د لا ښه کېدو او دې برخې ته د لا زیات پراختیا ورکولو ژمنه وکړه او د خدماتو پر کیفیت او همغږۍ یې ټینګار وکړ.
همدارنګه، ښاغلي لیپي په هرات، کندز او هلمند کې د خدماتو پر دوامداره ساتلو خبرې وکړې او زیاته یې کړه، چې یاد مرکزونه به د عامې روغتیا وزارت سره په همغږۍ فعال وساتي.
