د عامې روغتیا وزارت مسؤلینو او کارکوونکو ته په ټولنه کې د ناوړه او بدو رواجونو مخنیوي په موخه د عالیقدر امیرالمؤمنین حفظه الله تعالی د فرمان د تشریح او تدریس لړۍ پیل شوه
د تدریس په یاده لړۍ کې د عامې روغتیا وزارت د مقام د دفتر لوی رئیس، الحاج شیخ محمد طاهر حلیم ګډونوالو ته د ناوړه رواجونو مخنیوي په موخه د عالیقدر امیرالمؤمنین حفظه الله تعالی د فرمان بنسټیز اهداف، د شریعت له نظره یې اهمیت او د عملي تطبیق څرنګوالی روښانه کړ.
دغه راز، د عامې روغتیا وزارت د مقام د دفتر لوی رئیس په خپلو خبرو کې وویل؛ د امیرالمؤمنین حفظه الله تعالی دغه فرمان د اسلامي ټولنې د اصلاح، د باطلو رواجونو د له منځه وړلو او اسلامي ارزښتونو د پیاوړتیا لپاره یو مهم ګام دی.
د یادونې وړ ده، چې په دغه فرمان کې د کورني او ټولنیز ژوند، نکاح، مهر، حج او عمرې، د غم او ښادۍ او نور موضوعات شامل دي، چې د ټولنې د اصلاح او د فرمان د ښه تطبیق په موخه به لا دوامدار تدریس شي.
