په کابل کې د کولرا د مخنیوي لپاره د عامه پوهاوي کمپاین ترسره شو
د عامې روغتیا وزارت د چاپیریال روغتیا ریاست له لوري د کابل ۱۰مه او ۱۵مه ناحیه کې په یو شمېر مکتبونو او وړکتونونو کې د کولرا ناروغۍ د مخنيوي په موخه د عامه پوهاوي کمپاين ترسره شو
په دغه کمپاين کې ۴۰۰۰ تنه ښوونکو او زدهکوونکو ته د کولرا ناروغۍ د مخنيوي په موخه روغتيايي لارښوونې او معلومات ورکړل شول او د روغتيايي لارښوونو او معلوماتو ۲۵۰۰ تبلیغاتي پاڼې د مکتبونو او وړکتونونو په مناسبو ځایونو کې نصب او تشریح شوې؛ څو د یادې ناروغۍ د خپرېدو مخه ونیول شي او د زدهکوونکو روغتیا خوندي شي.
دغه راز، د چاپیریال روغتیا ریاست مسؤلینو له لوري په بیلابیلو مکتبونو او وړکتونونو کې ښوونکو او کارکوونکو ته د حفظ الصحې مراعتولو او روغتيايي کارتونو اخيستلو په موخه لازمې سپارښتنې وشوې؛ ترڅو زدهکوونکو ته د یو خوندي تعلیمي چاپیریال زمینه برابره شي.
