له ۲۰۲۶ زېږدیز کال څخه تر ۲۰۳۰ کلونو پورې د رواني روغتیا ملي ستراتیژۍ جوړولو لپاره د تخنیکي کمېټې غونډه تر سره وشوه
دا غونډه د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني په مشرۍ ترسره شوه، چې په کې د وزارت مرکزي رئیسانو، د روغتیا نړیوال سازمان، IOM او همکارو مؤسسو استازو ګډون کړی و.
د روغتیايي خدمتونو وړاندې کولو مرستیال، د رواني روغتیا ملي ستراتیژۍ جوړول د هېواد روغتیا سکټور کې د روغتیايي خدمتونو ښه والي لپاره یو مهم او ارزښتناک ګام وباله او ویې ویل: ( نن موږ د یو نوي فصل د پرانیستلو شاهدان یو او هڅه کوو، چې د دې ستراتیژۍ په جوړولو او پلي کولو سره په ټول هېواد کې اړمنو کسانو ته د رواني روغتیا برخه کې غوره خدمتونه وړاندې کړو ).
همداراز، ښاغلي مولوي عبدالولي حقاني ګډونوالو ته د دې ستراتیژۍ د جوړولو په موخه د عامې روغتیا وزارت د رهبرۍ د ملاتړ ډاډ ورکړ او د تخنیکي کمېټې له غړو یې وغوښتل، چې دا سند په لا زیاتې همغږۍ، د نظرونو په شریکولو، له باوري سرچینو او د ټولنې له تجربو او حقایقو څخه په ګټې اخیستنې جوړ کړي؛ تر څو په ټولنه کې د پلي کېدو وړ وي.
بل لور، د ناروغیو د کنټرول او مخنیوي لوی رئیس، ډاکټر حیدر خان حیدر، اړوندو مسؤلینو، د وزارت امرینو او د روغتیا نړیوال سازمان او همکارو ادارو استازو د راتلونکو پنځو کلونو لپاره د ملي رواني روغتیا ستراتیژۍ د جوړولو په اړه ویناوې وکړې.
