د عامې روغتیا وزیر د افغانستان لپاره د یونیسف سازمان له مشر سره وکتل
د عامې روغتیا وزیر، ښاغلي مولوي نور جلال جلالي د ولایتي رئیسانو په شتون کې د افغانستان لپاره د یونیسف سازمان له مشر، ښاغلي ډاکټر تاج الدین اوېلا او مل پلاوي سره د روغتیا په برخه کې د تطبیق کوونکو مؤسسو له لوري د ترسره شویو خدماتو د ارزونې په موخه لیدنه ترسره کړه
په دې لیدنه کې چې د عامې روغتیا وزارت د خوړو او درملو مرستیال، ښاغلي مولوي حمدالله زاهد هم شتون درلود، د تطبیق کوونکو مؤسسو له لوري روغتونونو ته پر وخت د درملو رسولو، د روغتیايي کارکوونکو د معاشاتو پر تعادل، په روغتیايي مراکزو کې تخنیکي ستونزو ته پر وخت رسېدنې، روغتونونو ته د ارتقاء ورکولو، د مور او ماشوم روغتیا برخه کې د لا زیاتو اسانتیاوو رامنځته کولو او ورته نورو موضوعاتو اړوند بحث او خبرې ترسره شوې.
د عامې روغتیا وزیر، ښاغلي مولوي نور جلال جلالي په هېواد کې د یونیسف سازمان له لوري د تطبیق کوونکو مؤسسو د تمویل په موخه مننه وکړه او د ارتقاء شویو روغتونونو او مراکزو د تمویل، دوه اړخیزې همغږۍ، په چارو کې د لا شفافیت، د درملو د کیفیت معلومولو او روغتونونو ته یې پر وخت رسولو برخو کې د یاد سازمان له لوري د یوې دوه اړخیزې کمېټې جوړېدو غوښتونکی شو.
د عامې روغتیا وزیر همداراز زیاته کړه، تطبیق کوونکې مؤسسې مکلفې دي، چې د درملو د کیفیت، اندازې او روغتونونو ته یې د رسولو برخه کې د ولایتي روغتیا رئیسانو سره معلومات شریک کړي.
بل لور د افغانستان لپاره د یونیسیف سازمان مشر په یادو برخو کې د همکارۍ ډاډ څرګند کړ او ویې ویل، زموږ موخه دا ده، چې د عامې روغتیا وزارت سره په ګډه ټولو افغانانو ته غوره روغتیايي خدمات وړاندې کړو او په دې برخه کې به د تل په څېر خپلو همکاریو ته دوام ورکړو.
