په تخار کې د ۳۵ لکه افغانیو په ارزښت یو شمېر روغتیايي پروژې ګټې اخیستنې ته وسپارل شوې
يادې پروژې د تخار عامې روغتیا ریاست په هڅو او د آغاخان روغتیايي خدمتونو بنسټ (AKHS) په مالي لګښت د دغه ولایت د ورسج ولسوالۍ په جامع روغتیايي مرکز کې د ۳۵ لکه افغانیو په ارزښت بشپړې او د یوې غونډې په ترڅ کې ګټې اخیستنې ته وسپارل شوې.
په دغو پروژو کې د ولادي څانګې د نوې ودانۍ جوړول، لابراتوار او د وینې بانک ته د طبي تجهیزاتو برابرول، د روغتیايي مرکز د ودانۍ ترمیم او رنګول، د احاطې دېوال جوړول او یو شمېر نورې پراختیايي پروژې شاملې دي.
د تخار ولایت عامې روغتیا رئیس، مولوي شیخ میر صدام د آغاخان روغتیايي خدمتونو بنسټ له دوامدارې همکارۍ او پاملرنې څخه مننه وکړه او ویې ویل: د روغتیايي خدمتونو پراختیا او د خلکو د اړتیاوو پوره کولو په موخه د داسې بنسټیزو پروژو پلي کول د خوښۍ او ډاډ وړ دي.
همدارنګه، د آغاخان مؤسسې د روغتیايي خدمتونو مرکزي رئیس، ډاکټر اکرامالدین یوسفزي وویل: د ورسج ولسوالۍ په جامع روغتیايي مرکز کې د یادو پروژو پلي کول به د سیمې د خلکو لپاره د روغتیايي خدمتونو د کیفیت او لاسرسي په ښه والي کې اغېزمن رول ولوبوي.
