په غزني کې زدهکړیالانو ته د نشهيي توکو د زیانونو په اړه علمي سیمینار ترسره شو
د غزني ولایت د روږدو درملنې ۵۰ بستریز روغتون مسؤلینو له لوري د نشه يي توکو د زیانونو مخنیوي په موخه د عمر روغتیايي علومو انسټیټیوټ زده کړیالانو ته یو علمي سیمینار ترسره شوه
په دې سیمینار کې شاوخوا ۲۵۰ زده کړیالانو ګډون کړی ؤ، چې موخه یې د نشه يي توکو د ناوړه اغېزو په اړه د علمي پوهاوي لوړول او راتلونکو روغتیايي کادرونو ته په یاده برخه کې کره معلومات وړاندې کول وو.
په دې سیمینار کې د نشه يي توکو ټولنیز، اقتصادي، رواني او روغتیايي زیانونه په علمي او هر اړخیز ډول تشریح شول او د یادو توکو د کارونې له امله رامنځته کېدونکې فردي او ټولنیزې ستونزې روښانه شوې.
همدارنګه، د نشه يي توکو مخنیوي، د روږدو پېژندنې او د درملنې مرکزونو ته د هغوی د راجع کولو په اړه هم مهم علمي معلومات وړاندې شول.
