د عامې روغتیا وزارت او اداري اصلاحاتو او ملکي خدمتونو ریاست تر منځ د اداري پروسو ساده کولو په موخه هوکړه لیک لاسلیک شو
په همدې موخه جوړه شوې ناسته کې د چارو ادارې لوی رئیس ښاغلي شیخ الحدیث مولوي نورالحق انور، د عامې روغتیا وزیر ښاغلي مولوي نور جلال جلالي، د روغتیا وزارت ښاغلو مرستیالانو، د اداري اصلاحاتو او ملکي خدمتونو ادارې لوی رئیس ښاغلي شیخ محمد طارق طاووس، د وزارت مرکزي رئیسانو او د بېلا بېلو ادارو یو شمېر مسؤلینو ګډون کړی و.
د چارو ادارې لوی رئیس، ښاغلي شیخ الحدیث مولوي نورالحق انور د اداري چارو ساده کولو پروسه د اسلامي نظام، عامې روغتیا وزارت او خلکو لپاره یوه مهمه لاسته راوړنه او ښه خبر یاد کړ، ترڅو له دې لارې د عامې روغتیا وزارت وکولای شي په کم وخت او شفافه توګه کارونو ته رسېدنه وکړي.
دغه راز د عامې روغتیا وزیر، ښاغلي مولوي نور جلال جلالي د دې هوکړه لیک لاسلیک په چارو کې د اسانتیا، روڼتیا، د وخت ضایع کېدو څخه مخنیوي او د خلکو روغتیايي اړتیاوو ته د رسېدنې برخو کې اغېزمن وباله او ویی ویل: " زموږ هدف دا دی، چې د روغتیایي خدمتونو کیفیت لوړ، دې خدمتونو ته لاسرسی زیات او په چارو کې روڼتیا رامنځته کړو ".
ښاغلي وزیر همداراز، د هېواد په ولسوالیو کې د عمومي روغتونونو جوړولو، په محرومو ولایتونو کې د متخصصینو ګمارلو، دغو ولایتونو ته د سهمیې ځانګړې کولو، په ځان بسیا روغتیايي سیسټم رامینځته کولو، روغتیايي خدماتو پراختیا او د خلکو روغتیايي اړتیاوو پوره کولو اړوند ګډونوالو سره معلومات شریک کړل.
بل لور، د اداري اصلاحاتو او ملکي خدمتونو ادارې لوی رئیس، شیخ محمد طارق طاووس په تېرو دریو کلونو کې د دې ادارې د فعالیتونو یادونه وکړه او ویې ویل: ( دا هوکړه لیک په ټولو ادارو کې د تطبیق وړ دی او موږ غواړو د دې هوکړه لیک په لاسلیک کولو سره په اداري چارو کې اسانتیا رامنځته، چارې پر ټاکلي وخت ترسره او د کاغذ پرانۍ او وخت ضایع کېدو څخه د مخنیوی ترڅنګ شفافیت رامنځته کړو، چې دا پروسه نه یوازې په مرکز بلکې په ولایتونو کې هم د پلي کېدو وړ ده ).
