د عامې روغتیا وزارت د خوړو او درملو معینیت کارکوونکو ته د «داخلي تولیداتو د جامع دوسیې (DMF) ارزونې» تر سرلیک لاندې درې ورځنی روزنیز پروګرام پیل شو
د دې پروګرام د جوړېدو موخه د کارکوونکو مسلکي ظرفیت لوړول، د تخنیکي دوسیو د ارزونې بهیر معیاري کول، د تنظیمي مهارتونو پیاوړتیا او د داخلي تولیداتو د ثبت سیستم ښه کول دي چې ګډونوالو ته به کې د DMF ډولونه، د ارزونې لارې چارې، فرمولیشن، لیبل لګول، قیمت ټاکل او نور اړوند تخنیکي موضوعات تدریس شي.
په دې پروګرام کې د درملو او روغتیایي محصولاتو د ارزونې او ثبت رئیس، ډاکټر ابراهیم شیرزاد د کارکوونکو د مسلکي پوهې او مهارتونو لوړولو پر اهمیت ټینګار وکړ او د تولید د جامع دوسیې (DMF) اساسي رول یې د کیفیت تضمین، شفافیت او له ملي او نړیوالو معیارونو سره د سمون په برخه کې روښانه کړ.
