د روغتيايي خدمتونو د EPHS او BPHS بستو (کڅوړو) د بیاکتنې په موخه تخنیکي ناسته ترسره شوه
ياده ناسته د عامې روغتيا وزارت د پلان او پاليسۍ لوی رئیس، ډاکتر سید رسول منګل په مشرۍ د اړوند ریاستونو د استازو، تمویلوونکو او همکارو مؤسسو د استازو په شتون کې ترسره شوه.
په دې ناسته کې د روغتيايي خدمتونو د EPHS او BPHS کڅوړو نوي کېدل، د دې خدمتونو د پلي کېدو پړاوونه، د خدماتو کچې، د روغتيايي مرکزونو لپاره د بشري سرچینو اړتیاوې، تجهیزاتي لېستونه او ساختماني ظرفیتونه په هر اړخیزه توګه وڅېړل شول.
همدارنګه، د پروګرامي او عمودي (Vertical) خدماتو ادغام، د خدماتو د پوښښ پراختیا او د باکیفیته او معیاري روغتيایي خدماتو وړاندې کول د دې ناستې له نورو موضوعاتو څخه وو، چې له ګډونوالو سره شریک او هر اړخيز بحث پرې وشو.
ګډونوالو د پورته ذکر شويو موضوعاتو په اړه خپل تخنیکي نظرونه او وړاندیزونه شریک او د بشري سرچينو د اړتیاوو معلومولو، د تجهيزاتو د معياري لیستونو برابرولو او د خدماتو د بستو تفصیلي جوړښت په موخه د اړوندو څانګو د متخصصینو او کارکوونکو په ګډون درې فرعي کمېټې وټاکل شوې؛ تر څو چارې په چټکۍ سره تر سره شي.
