د عامې روغتیا وزیر د WHO له مشر سره د روغتیايي خدماتو پر پراختیا خبرې وکړې
د ا.ا.ا د عامې روغتیا وزیر، ښاغلي مولوي نور جلال جلالي په خپل کاري دفتر کې د افغانستان لپاره د روغتیا نړیوال سازمان له مشر، ډاکټر ایډوین سنیزا سلواډور او د یاد سازمان او نورو مسؤلینو سره د یو شمېر مهمو موضوعاتو اړوند لیدنه ترسره کړه:
په دې لیدنه کې د روغتیایي خدماتو پر پراختیا، ظرفیت لوړونې، د سرطاني ناروغيو اړوند خدماتو د پراختیا، کړنو پر د مهال همغږۍ، د روغتیایي خدماتو په وړاندې کولو کې شفافیت او د راتلونکو ناستو پر اجنډا، څرنګوالي، همغږۍ او اړوندو موضوعاتو بحث او خبرې ترسره شوې.
د عامې روغتیا وزیر وویل:( زمونږ لپاره د عامې روغتیا وزارت ملي پالیسي او د ملي ستراتیژۍ سندونه مهم دي او باید د همدې سندونو پر اساس د عامې روغتیا وزارت لومړیتوبونو او اړتیاوو ته په نظر کولو سره روغتیایي خدمات تر سره او پروژې تطبیق شي).
ښاغلي وزير همداراز، د روغتیا نړیوال سازمان له مسؤلینو څخه د شفافیت او ښې همغږۍ ته د زیاتې پاملرنې او اړینو اقداماتو غوښتونکی شو؛ تر څو د روغتیایي خدماتو کیفیت لوړ او خلک په سمه توګه روغتیایي خدماتو ته لاسرسی ولري.
بل لور، د روغتیا نړیوال سازمان مشر ژمنه وکړه، چې هڅه به یې د عامې روغتیا وزارت سره دوامداره همغږي او د وزارت له پالیسۍ او لومړیتوبونو سره سم د اړتیا وړ خدماتو تنظیم او وړاندې کول وي.
