د ویاندویۍ، اطلاعاتو او عامه اړیکو ریاست کارکوونکو ته د RCCE، SBC او WASH برخو کې درې مهم روزنیز ټریننګونه ورکړل شول

د عامې روغتیا وزارت د ویاندویۍ، اطلاعاتو او عامه اړیکو ریاست کارکوونکو ته د خطر مفاهمې او ټولنې ښکېلتیا (RCCE)، د ټولنیز سلوک بدلون (SBC) او د اوبو، حفظ الصحې او نظافت (WASH) اړوند درې روزنیز ټریننګونه ورکړل شو:

دغه ټریننګونه د یاد وزارت عامې روغتیا ملي انسټیټیوټ د روغتیا ارتقاء امریت په همکارۍ د ویاندویۍ، اطلاعاتو او عامه اړیکو ریاست د کارکوونکو ظرفیت لوړونې او ولس ته په یادو برخو کې د ښه پیغام رسونې په موخه تر سره شو، چې پای مراسمو کې یې د عامې روغتیا وزارت د مقام د دفتر لوی رئیس الحاج شیخ محمد طاهر حلیم، د نړیوالو اړیکو، مرستو د همغږۍ او انسجام رئیس مولوي محمد داوود منصوري، د وزارت ویاند او د عامه اړیکو رئیس ډاکټر شرافت زمان، د روغتیا ارتقاء امر ډاکټر عبدالجبار حیدر او یو شمېر نورو مسؤلینو شتون درلود.

د عامې روغتیا وزارت د مقام د دفتر لوی رئیس الحاج شیخ محمد طاهر حلیم د کارکوونکو د روزنې پر ارزښت، د حفظ الصحې، نظافت او نورو تدریس شویو موضوعاتو اړوند هر اړخیزې خبرې وکړې او د داسې برنامو تر سره کول یې ګټور وبلل.

نوموړي زیاته کړه، د اسلام مبارک دین په دې اړه مونږ ته خورا ارزښتمنې سپارښتنې او لارښوونې لري، چې په پام کې نیولو او عملي کولو سره یې له ډېری ناروغیو او له امله یې د پېښېدونکو ضررونو څخه ژغورل کېږو.

همدارنګه، د عامې روغتیا وزارت د نړیوالو اړیکو، مرستو د همغږۍ او انسجام رئیس مولوي محمد داوود منصوري د یاد ټریننګ اړوند خپل نظر شریک او له ګډونوالو څخه یې د دوامداره زده کړې او په ژوند او کاري چاپیریال یې کې د عملي کولو غوښتنه وکړه.

ورته مهال، د روغتیا ارتقاء امر ډاکټر عبدالجبار حیدر په خپلو خبرو کې وویل: زمونږ موخه په ټولنه کې د ذکر شویو ټریننګونو او برنامو په سمه توګه تطبیق دی؛ څو لا په سمه توګه پیغامونه ورسول شي او دې برخه کې به خپلې هڅې جاري ساتو.

په پای کې ګډونوالو ته د خطر مفاهمې او ټولنې ښکېلتیا (RCCE)، د ټولنیز سلوک بدلون (SBC) او د اوبو، حفظ الصحې او نظافت (WASH) برخو کې د ورکړل شوي روزنیز ټریننګ سندونه ووېشل شول.