د افغانستان اسلامي امارت د عامې روغتیا وزیر ښاغلي مولوي نور جلال جلالي کنړ ولایت ته د خپل رسمي سفر پر مهال ولایتي دوه سوه بستریز روغتون د تعمیراتي چارو بیا ځلي پیل پرانسته تر سره کړه
د یادې پرانستې پر مهال، چې د کنړ ولایت والي ښاغلي مولوي قدرت الله ابوحمزه، د کنړ د عامې روغتیا رئیس ښاغلي قاري مظفر خان مخلص او د کنړ ولایت یو شمېر مسؤولینو، قومي مخورو او علماء کرامو شتون درلود بېلا بېلو مسؤولینو د یاد روغتون د چارو د بیا ځلي پیل اړوند ویناوې تر سره کړې.
د دې روغتون تعمیر چې چارې یې نیمګړې پاتې وې، د افغانستان اسلامي امارت په خپله داخلي بودیجه د نږدې ۲۷۸ میلیونه افغانیو په لګښت سره به یې پاتې چارې بشپړې شي.
ښاغلي وزیر مولوي نور جلال جلالي د پرانستې پر مهال وویل، د دې تعمیر په جوړېدو سره به د کنړ درنو ولسونو ته به یو معیاري ودانۍ کې د روغتیايي خدماتو پیل وشي، چې دا د ولسونو له ډیر وخت هیله او غوښتنه وه چې له نېکه مرغه د اسلامي امارت د رهبرۍ له لوري ورته ځانګړې پاملرنه وشوه او نن یې د چارو د بیا ځلي پیل شاهدان یو.
همدارنګه، د کنړ د عامې روغتیا رئیس ښاغلي قاري مظفر خان د عامې روغتیا وزارت له رهبرۍ مننه وکړه، چې د ولس غوښتنو ته یې مثبت ځواب ورکړ او د دې روغتون په جوړېدو سره به د کنړ ولسونو ته د روغتیا په برخه کې خورا ګڼې اسانتیاوې را منځته شي.
دغه راز، په غونډه کې د قومي مخورو او نورو مسؤولینو لخوا ویناوې تر سره شوې چې د عامې روغتیا وزارت او افغانستان اسلامي امارت له دې اقدام یې خوښي څرګنده کړه او په وینا یې دا د نظام له لوري د کنړ له ولسونو سره خورا ستره ښېګڼه ده او ولسونه یې قدرداني کوي.
