د عامې روغتیا وزارت د څارنې او پلټنې لوی ریاست په مشرۍ د مرکزي او ولایتي عامې روغتیا ریاستونو ترمنځ د لا ښې همغږۍ او په دندو کې د نه تداخل په موخه غونډه ترسره شوه

په دې غونډه کې د عامې روغتیا وزارت د څارنې او پلټنې لوی رئیس ډاکټر عنایت الله عنایت، د وزارت د مقام مشاور، د روغتیايي خدمتونو وړاندې کولو معینیت مشاور او د اړوندو ادارو استازو ګډون کړی و، چې په کې د مرکزي او ولایتي عامې روغتیا ریاستونو ترمنځ د لا زیاتې همغږۍ او په دندو کې د نه تداخل په موخه هر اړخیز بحث ترسره او پرېکړه وشوه، چې د یاد بهیر د اغېزمنتیا لپاره به لومړی له مرکزي ریاستونو څخه پیل او وروسته به په ولایتونو کې هم اصلاحات عملي شي او په هغو ریاستونو کې چې وظیفوي تداخل موجود وي، له "Top to Bottom" بهیر څخه کار واخیستل شي.

دغه راز، په یاده غونډه کې پرېکړه وشوه، چې لومړی به د مرکزي ریاستونو تر منځ په لایحه وظایفو کې د تداخل ستونزې پیدا کوي او د حل لپاره به یې لازم اقدامات ترسره کېږي او له هغه وروسته به د ولایتونو د عامې روغتیا ریاستونو د لایحه وظایفو مشترکات له منځه وړل کېږي او په پای کې به کاري راپور د وزارت مقام ته د اجرااتو په موخه وړاندې کېږي.