د روغتیايي خدمتونو مرستیال د خوست ولایتي روغتون له چارو نظارت وکړ
د ا.ا.ا. د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني او مل پلاوي خوست ولایت ته د سفر پرمهال له ولایتي روغتون څخه نظارت ترسره او هم یې د یاد روغتون له مسئولینو او روغتیايي کارکوونکو سره د ستونزو حل په موخه ناسته وکړه
د روغتیايي خدمتونو وړاندې کولو مرستیال په مشرۍ یاد پلاوي د خوست ولایتي روغتون له ټولو څانګو څخه لیدنه ترسره، ستونزې یې په نښه او د حل په موخه یې د یاد ولایت تطبیق کوونکې مؤسسې، روغتیايي مسئولینو او کارکوونکو سره شریکې کړې.
ښاغلي مرستیال، په یاده ناسته کې د روغتیايي کارکوونکو ترسره کړې هڅې وستایلې، په روغتون کې یې د شته ستونزو د له منځه وړلو په موخه روغتیايي کارکوونکو ته سپارښتنې وکړې او ویې وویل: (خوست ولایت ته مو په دې موخه سفر وکړ، تر څو په دې ولایت کې روغتیايي ستونزې له نږدې وګورو او ورته د حل په لارو چارو غور وکړو).
