د عامې روغتیا وزیر بادغیس ته د سفر پرمهال دغه ولایت کې په لومړي ځل د پیلېدونکي دولتي روغتیایي علومو انسټېټیوټ پرانیسته ترسره کړه
د ا.ا.ا د عامې روغتیا وزیر، ښاغلي مولوي نور جلال جلالي بادغیس ته د سفر پرمهال دغه ولایت کې په لومړي ځل د پیلېدونکي دولتي روغتیایي علومو انسټېټیوټ پرانیسته ترسره کړه
په همدې موخه جوړو شويو مراسمو کې د عامې روغتیا وزیر، ښاغلي مولوي نور جلال جلالي، د بادغيس والي حافظ محمد امین جان عمري، د ياد ولایت عامې روغتیا رئيس مولوي خان محمد همت، د عامې روغتیا وزارت د کارکوونکو چارو لوی رئیس عرفان الله کریمي په شمول مرکزي رئيسانو، قومي مشرانو، روغتیاپالانو او د سيمې اوسېدونکو ګډون کړی و.
د عامې روغتیا وزیر، ښاغلي مولوي نور جلال جلالي بادغیس ولایت کې د دولتي روغتیایي علومو انسټېټیوټ جوړېدل لويه لاسته راوړنه وبلله او دا یې یاد ولایت کې د نيمه روغتيايي زده کړو برخه کې د شته تشې ډکول او په دې برخه کې د ستونزو له منځه وړل یاد کړل.
ښاغلي وزیر زیاته کړه، د دې روغتیایي علومو انسټېټیوټ تشکیلاتي جوړښت تکمیل شوی او مناسب ځای ورته ځانګړی شوی، چې په مرسته به یې د یاد ولايت سلګونه زده کړيالان په څلورو بېلا بېلو څانګو کې خپلې زده کړې ترسره کوي.
د بادغيس ځایي اوسېدونکو د عامې روغتیا وزارت له ورغلي پلاوي څخه د مننې تر څنګ روغتيا برخې سره د نورو همکاريو غوښتنه وکړه، چې د عامې روغتیا وزارت رهبرۍ له لوري ورته د پاملرنې ډاډ ورکړل شو.
