د عامې روغتیا وزارت له لوري اندراګاندي د ماشومانو درملنې روغتون کې د اکسیجن د تولید دستګاه، جنراتور او برانکوسکوپي څانګه پرانیستل شوه
په همدې موخه جوړو شویو مراسمو کې د عامې روغتیا وزیر، ښاغلي مولوي نور جلال جلالي، د روغتیا نړیوال سازمان استازي، ډاکټر ایډوین سینیزا سلاوډر، د اروپایي ټولنې استازو، د وزارت مرکزي رئیسانو، اندراګاندي د ماشومانو درملنې روغتون رئیس، روغتیايي کارکوونکو او د رسنیو استازو ګډون درلود
د عامې روغتیا وزیر، د روغتیا نړیوال سازمان او اروپایي ټولنې له استازو څخه مننه وکړه او ویې وویل، هڅه کوو چې د هېواد په ټولو ملي او تخصصي روغتونونو کې هېوادوالو ته معیاري روغتیایي خدمات وړاندې کړو.
ښاغلي وزیر دغه راز، د سرچینو پر سالم مدیریت او شفافیت ټینګار وکړ؛ تر څو د عامې روغتیا سکټور د نورو له احتیاجه خلاص او په ځان بسیا شي.
د عامې روغتیا وزارت د تخصصي او ثالثي روغتونونو رئیس، ډاکټر امین الله مومند د دغو ماشینونو د ساتلو لپاره اړوندو مسؤلینو ته لازمې سپارښتنې وکړې؛ تر څو د خرابېدو مخنیوی یې وشي.
همدارنګه، د معالجوي طب لوی رئیس، ډاکټر وحدت الکوزي وویل، د یادو ماشینونو په فعالیت سره به ناروغانو ته لازمې روغتیایي اسانتیاوې رامنځته او نږدې راتلونکي کې به دغه روغتون کې د سرطان ناروغۍ درملنې ځانګړې څانګې د جوړېدو شاهدان اوسو.
د یادونې وړ ده، چې د اکسیجن د تولید دستګاه، جنراتور او د برانکوسکوپي څانګه چې پر عصري تجهیزاتو سمبال ده، د اروپایي ټولنې په مالي مرسته د یو میلیون او پنځه شپېته زره ډالرو په لګښت، چې نږدې ۷۶ میلیونه افغانۍ کېږي، جوړ او ګټې اخیستنې ته وسپارل شول.
