هرات کې بېرته راستنېدونکو ته د وړاندې کېدونکو روغتیايي خدمتونو له بهیر څخه د عامې روغتیا وزارت د روغتیايي خدمتونو وړاندې کولو مرستیال لیدنه
د ا.ا.ا د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني او مل پلاوي د هرات په اسلام قلعه مرز کې بېرته راستنېدونکو هېوادوالو ته د وړاندې کېدونکو روغتیايي خدمتونو څخه لیدنه وکړه.
په دې لیدنه کې د روغتیايي خدمتونو وړاندې کولو مرستیال، د مل تخنیکي ټیم سره په ګډه، چې د هرات عامې روغتیا رئیس مولوي محمد طالب شاهد یې هم ملتیا کوله، روغتیايي کارکوونکو ته سپارښتنې وکړې، چې بېرته راستنېدونکو ته په پوره اخلاص او صداقت سره روغتیايي خدمتونه وړاندې کړي.
دغه راز، د تخنیکي ټیم له لوري شته ستونزې په نښه او د حل په موخه له اړوندو مسؤلینو سره شریکې شوې.
د یادونې وړ ده، چې د عامې روغتیا وزارت له لوري بېرته راستنېدونکو هېوادوالو لپاره په تورخم، نیمروز، کندهار، هرات او نورو فرضي کرښو ته څېرمه سیمو کې هم روغتیايي ټیمونه ګمارل شوي او ټولو ته بېلا بېلو برخو کې ۲۴ ساعته روغتیايي خدمتونه وړاندې کېږي.
