د بېرته راستنېدونکو هېودالو لپاره د روغتیایي خدماتو اړوند د بېلا بېلو ادارو له استازو سره د همغږۍ ناسته ترسره شوه

په دې ناسته کې د عامې روغتیا وزارت د روغتیایي خدمتونو وړاندې کولو مرستیال ښاغلي مولوي عبدالولي حقاني، د وزارت مرکزي رئیسانو، د روغتیا نړیوال سازمان، یونیسیف، UNHCR، IOM او UNFPA استازو ګډون کړی و.

 د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني د یادو سازمانونو له استازو څخه وغوښتل، چې د روغتیا وزارت سره د راستنېدونکو هېوادوالو روغتیایي ستونزو ته د رسېدنې برخه کې همغږي اوسي او د راستنېدونکو لپاره د بېړنیو او دوامداره روغتیایي خدمتونو په وړاندې کولو کې له دې وزارت سره همکار اوسي، په ځانګړې توګه په هغه ولایتونو کې چې راستنېدونکي په کې مېشت وي.

بل لور د روغتیا نړیوال سازمان، یونیسف، UNHCR، IOM او UNFPA استازو ژمنه وکړه، چې د روغتیا وزارت سره په همغږۍ به د راستنېدونکو کډوالو لپاره د لومړنیو روغتیایي خدماتو ترڅنګ د مور او ماشوم خدماتو برخه کې هم همکاري وکړي.