د ا.ا.ا. د عامې روغتیا وزارت له لوري د نري رنځ (توبرکلوز) پر وړاندې د مبارزې او عامه پوهاوي غونډه ترسره شوه.
په همدې موخه جوړو شویو مراسمو کې د عامې روغتیا وزیر ښاغلي مولوي نورجلال جلالي، مالي او اداري چارو مرستیال ښاغلي ملابخت الرحمن شرافت، د روغتیايي خدمتونو وړاندې کولو مرستیال ښاغلي مولوي عبدالولي حقاني، مرکزي رییسانو، د ملي او نړیوالو روغتیایي بنسټونو مسئولینو او روغتیايي کارکوونکو ګډون کړی و.
د عامې روغتیا وزارت روغتیايي خدمتونو وړاندې کولو مرستیال، ښاغلي مولوي عبدالولي حقاني نری رنځ په نړۍ کې د مړینې د لسو مخکښو وژونکو ساري ناروغیو له جملې وباله او ورته په ځانګړې پاملرنې یې ټینګار وکړ.
ښاغلي مرستیال وویل: "موږ کولای شو د ژمنې، پانگونې او خدمتونو وړاندې کولو له لارې نری رنځ له منځه یوسو، ترڅو وکولی شو د هېواد په کچه د نري رنځ ټولو ناروغانو ته د اړتيا وړ درملنې خدمتونه ورسوو او له خپلې ټولنې یې له منځه یوسوو"
د روغتیايي خدمتونو وړاندې کولو مرستیال دغه راز زیاته کړه عامې روغتیا وزارت توانیدلی، چې تېر کال کې د دې ناروغۍ یو پنځوس زره درې سوه نولس پېښې تشخیص او درملنه یې وکړي.
د یادونې وړه، چې په دې مراسمو کې د عامې روغتیا وزارت یو شمېر مسئولینو د یادې ناروغۍ برخه کې د ترسره شویو روغتیایي خدمتونو او ناروغانو درملنې په اړه هر اړخیز معلومات وړاندې کړل.
