د عامې روغتیا وزارت مشرتابه پلاوي د حیرتان ګمرک له رئیس سره وکتل
سه شنبه، کب ۳/۱۴۰۰
د عامې روغتیا وزارت د پالیسۍ او پلان مرستیال ډاکتر محمد حسن غیاثي او مل پلاوي د حيرتان ګمرک له رئیس مولوي عبدالمتين سعيد سره د یوې ناستې په ترڅ کې لیدنه او خبرې وکړې.
په دې لیدنه کې د عامې روغتیا وزارت پلاوي کابل ته د عامې روغتیا وزارت د یو شمېر امبولانسونو د لېږد د اجازې، د حيرتان بندر له لارې هېواد ته د بې کيفيته درملو د واردولو د مخنیوي او د نړیوالو مرستندویه بنسټونو د درملو په کاري بهیر کې د اسانتیاوو په اړه د ګمرک له رئیس سره خبرې وکړې او له هغه یې وغوښتل چې په دې برخه کې د عامې روغتیا وزارت سره بشپړه همکاري وکړي.
دغه راز د حيرتان ګمرک رئيس مولوي عبدالمتين سعيد د عامې روغتيا وزارت مشرتابه پلاوي د وړانديزونو له اورېدو وروسته ژمنه وکړه، چې په دې برخه کې به له عامې روغتيا وزارت سره بشپړه همکاري کوي او هېڅ ډول هڅې به ونه سپموی.
له بلې خوا د عامې روغتیا وزارت مشرتابه پلاوي د حيرتان له لس بستريز روغتون څخه ليدنه وکړه او په دغه مرکز کې يې د روغتيايي خدمتونو وړاندې کول له نږدې وڅېړل.
دغه پلاوي له خپلو ارزونو او موندونو وروسته مسوولینو ته لارښوونه وکړه چې اړمنو کسانو ته د روغتیايي خدمتونو وړاندې کولو د کیفیت لوړولو د ښه والي برخه کې زیاته پاملرنه وکړي.
