په قزاقستان کې د طبي تجهیزاتو د تولید او تخنیکي همکاریو پراختیا په موخه لیدنې ترسره شوې
د عامې روغتیا وزارت د خوړو او درملو مرستیال، ښاغلي مولوي حمدالله زاهد او مل پلاوي قزاقستان هېواد ته د خپل سفر په ترڅ کې د درملو او روغتيايي محصولاتو د کیفیت کنټرول لابراتوار او د طبي تجهیزاتو له تولیدي کارخونې څخه لیدنې وکړې
ښاغلي مرستیال د ياد هېواد د روغتیا وزارت اړوند د درملو او روغتیايي محصولاتو د کیفیت کنټرول لابراتوار له بېلابېلو برخو څخه د لیدنې پر مهال له قزاقستاني چارواکو سره تخنیکي بحثونه ترسره او د دواړو هېوادونو ترمنځ يې د راتلونکو همکاریو، تجربو شریکولو او د ورته لیدنو د دوام په اړه خبرې وکړې.
همدارنګه، یاد پلاوي د قزاقستان هېواد په الماتا ښار کې د (JULDYZ KENAN) په نوم د طبي تجهیزاتو له تولیدي کارخونې او د کیفیت کنټرول لابراتوار څخه هم ليدنې وکړې او د کارخونې له مسؤلینو يې وغوښتل، چې یاد شرکت به د خپلو ۱۲۰ ډوله تولیدي محصولاتو لېست له مناسبو بیو سره شریک کړي؛ څو د هېواد په بازارونو کې له موجودو وارداتي محصولاتو سره یې پرتله وشي او د دولتي او خصوصي روغتیايي سکتور د اړتیاوو پوره کولو لپاره یې د تدارک زمینه برابره شي.
دغه راز، ياد شرکت ژمنه وکړه، چې په اوږدمهال کې به له افغاني تولیدي کارخونو سره په ګډه په افغانستان کې د یادو طبي تجهیزاتو د تولید امکانات وارزوي؛ څو اړوند ټکنالوژي دغه هېواد ته ولېږدول شي او اړین روغتیايي محصولات په داخل د هېواد کې تولید شي.
