بادغیس ولایت کې د اوټرېچ پروګرام واکسیناتورانو ته ۲۸ عرادې نوي موټرسایکلونه ووېشل شول
دغه موټرسایکلونه د بادغیس عامې روغتیا ریاست له لوري، د یونیسف ادارې په مالي ملاتړ، واکسیناتورانو ته د تګ راتګ د اسانتیا، لرو پرتو سیمو ته د هغوی د لاسرسي او په دغو سیمو کې د واکسیناسیون خدمتونو د وړاندې کولو بهیر د لا ښه والي په موخه برابر او ووېشل شول.
یاد موټرسایکلونه د بادغیس عامې روغتیا رئیس خانمحمد همت او د یو شمېر امارتي ادارو د مسؤلینو په شتون کې د اوټرېچ پروګرام واکسیناتورانو ته وسپارل شول.
د بادغیس عامې روغتیا ریاست مسؤلینو د یادو وسایطو پر اغېزمنې کارونې او په لرو پرتو سیمو کې د واکسیناسیون خدمتونو پر پیاوړتیا ټینګار وکړ او ویې ویل: واکسیناتورانو ته د اړینو اسانتیاوو برابرول کولای شي، ماشومانو ته د اړتیا وړ واکسینونو رسولو او هغوی ته د روغتیايي خدمتونو د لاسرسي زمینه لا ښه برابره کړي.
