څه باندې ۷.۸ ټنه غیرمعیاري او له نېټې تېر خوراکي توکي له منځه یووړل شول
د عامې روغتیا وزارت د خوړو او درملو معینیت د څارنې او پلټنې ریاست د خوړو خوندیتوب آمریت له لوري د کابل ښار بېلا بېلو ناحیو له بازارونو څخه د نظارتونو په ترڅ کې څه باندې ۷.۸ ټنه غیرمعیاري، له نېټې تېر او بې کیفیته خوراکي توکي، چې د کیک او کلچې بېلابېل ډولونه، پنیر، بېلا بېل مشروبات، بسکیټ، مصاله، چای، شیدې، مربا، جوسونه، چپس او مایونیز په کې شامل وو، راټول او د ټاکل شوي پلاوي او اړوندو ادارو د استازو په شتون کې په خوندي ډول له منځه یووړل شول.
د خوړو او درملو معینیت ټینګار کوي، چې د خوراکي توکو له عرضه کوونکو مرکزونو څخه به په دوامداره توګه څارنه او پلټنه ترسره کېږي او د غیرمعیاري او له نېټې تېر خوراکي توکو د عرضې او پلور په وړاندې به د نافذه قوانینو او مقرراتو له احکامو سره سم قانوني چلند وشي.
همدارنګه، دغه معینیت له ښاریانو څخه غواړي چې د خوراکي توکو د پېرلو پر مهال د هغو د مصرف نېټې، کیفیت، بسته بندۍ او د محصولاتو قانوني جواز لرلو ته پاملرنه وکړي او که له کومې مشکوکې سرغړونې سره مخ شي، نو موضوع دې د ۷۰۱ شمېرې له لارې د خوړو او درملو له معینیت سره شریکه کړي.
