په نورستان کې د نشهیي توکو د مخنیوي په موخه د عامه پوهاوي پروګرام ترسره شو
د روږدو درملنې ملي برنامې ریاست د نورستان ولایت د روږدو درملنې شل بستریز روغتون د عامه پوهاوي ټیم له لوري د «مانده» کلي په جومات کې د نشه یي توکو د کارونې مخنیوي په موخه د عامه پوهاوي پروګرام ترسره شو:
د دې پروګرام موخه د خلکو، په ځانګړې توګه د ځوانانو د پوهاوي کچې لوړول وو؛ څو هغوی د نشه یي توکو د کارونې له امله د رامنځته کېدونکو روغتیايي، رواني، ټولنیزو او اقتصادي زیانونو په اړه معلومات تر لاسه کړي. په دغه پروګرام کې ګډونوالو ته د نشه یي توکو د ډولونو، د هغو د زیانمنو اغېزو، د روږدیتوب د ناوړه پایلو او د مخنیوي لارو چارو په اړه معلومات وړاندې شول.
په پای کې ټینګار وشو، چې د نشه یي توکو پر وړاندې مبارزه د ټولو ګډې همکارۍ ته اړتیا لري او د عامه پوهاوي پروګرامونو دوام کولای شي، د یوې سالمې او له روږدیتوب څخه پاکې ټولنې په رامنځته کولو کې مهم رول ولوبوي.
