ننګرهار سیمه ییز تخصصي روغتون کې لومړي ځل لپاره د لیزر په واسطه د ماشومانو د سر عملیاتو ماشین فعال شو
د ننګرهار عامې روغتیا ریاست په هڅو د عصبي جراحي نړیوالې ټولنې له لورې د سیمه ییز روغتون عصبي جراحي وارډ ته د ۳۰ زره یورو په مالي لګښت یو ماشین وسپارل شو، چې پر مټ به یې د لیزر په واسطه د هغو ماشومانو د سر عملیاتونه ترسره کېږي، چې په پیدایښتي ډول یې دماغو کې د اضافه اوبو له امله سر لوی شوی وي.
د ننگرهار عامې روغتیا رئیس، مولوي امین الله شریف په همدې موخه جوړه شوې غونډه کې د وینا پر مهال د عصبي جراحي نړیوالې ټولنې څخه د همکارۍ په موخه مننه وکړه، په دې برخه کې د ننګرهار سیمه ییز روغتون د ډاکټرانو هڅې وستایلې او له یادې ټولنې څخه یې د پرمختللو طبي وسایلو برخه کې د لا مرستې غوښتنه وکړه.
