د میدان وردګو په لرې پرتو سیمو کې د زېږون روغتیایي خدماتو ارزونه ترسره شوه
د زېږون (باروري) روغتیا ریاست تخنیکي ټیم د افغان کورنۍ ټولنې دفتر او تطبیق کوونکې مؤسسې له ټیم سره په ګډه، د میدان وردګ ولایت د روغتیایي مرکزونو له بېلا بېلو برخو څخه نظارت ترسره کړ، چې موخه یې د دغه ولایت په لرې پرتو سیمو کې د زېږون برخې روغتیایي خدماتو کیفیت او د زېږون خوندي وقفې اړوند اقلامو ته د اړمنو مېرمنو لاسرسي ډاډمن کول وو.
د دې نظارت په ترڅ کې همداراز، د تخنیکي ټیم له لوري ننګونې او ستونزې په نښه او ممکنه حل لارې یې د پلي کوونکې مؤسسې سره شریکې کړې، سربیره پردې، د موندنو او فیډبیکونو یو بشپړ راپور چمتو شو، چې د روغتیايي خدمتونو د کیفیت ښه والي په موخه به د یاد ولایت له روغتیايي همکارانو سره شي.
