د عامې روغتیا وزیر له هزاره او غارو کلیو څخه لیدنه ترسره کړه
د عامې روغتیا وزیر، ښاغلي ډاکټر قلندر عباد او ورسره مل پلاوي بغلان ولایت د سفر په ترڅ کې د ګذرګاه ولسوالۍ اړوند، له هزاره او غارو کلیو څخه چې د وروستیو سېلابونو له امله یې اوسېدونکې زیانمن شوې لیدنه ترسره کړه
په دې لیدنه کې د عامې روغتیا وزیر، ښاغلي ډاکټر قلندر عباد د سېلابونو له امله د زیانمنو شویو سیمو څخه د نږدې لیدنې او د ولسونو سره د غم شریکۍ سربېره ژمنه وکړه، چې د عامې روغتیا وزرات به په دې ولایت کې د زیانمنو شویو سیمو اوسېدونکو ته د روغتیايي خدمتونو د وړاندې کولو په برخه کې له هیڅ ډول هڅو او کوششونو دریغ ونه کړي.
د عامې روغتیا وزیر همداراز د په بغلان ولایت کې د وروستیو سېلابونو له امله زیانمنو شویو ته د روغتیا په برخه کې د روغتیايي کارکوونکو د هڅو او کوښښونو مننه وکړه او مسؤلینو ته یې سپارښتنه وکړه، چې په هزاره او غارو سیمو کې د وروستیو سېلابونو له امله د زیانمنو شویو هېوادوالو روغتیايي حالت ته هر اړخیزه پاملرنه وکړي.
