د عامې روغتیا وزیر او د روغتیا نړیوال سازمان د ختیځې مدیترانې د مشر لیدنه؛ د پولیو د بشپړ محوې پر لارو چارو بحث وشو
د ا.ا.ا د عامې روغتیا وزیر، ښاغلي مولوي نور جلال جلالي په خپل کاري دفتر کې د روغتیا نړیوال سازمان د پولیو ناروغۍ سره د مبارزې اړوند د ختیځې مدیترانې حوزې له مشر، ښاغلي ډاکتر حامد رضا جعفري او مل پلاوي سره لیدنه تر سره کړه
په دې لیدنه کې د روغتیا نړیوال سازمان د فعالیتونو تازه راپور، د عامې روغتیا وزارت رهبرۍ د څرګندونو پر بنسټ د ګډ پروګرام ارزونې، د پولیو ناروغۍ د محوې، د روغتیایي کارکوونکو د پولیو د تشخیص برخه کې روزنې او یو شمېر نورو مهمو موضوعاتو اړوند بحث او خبرې تر سره شوې.
د عامې روغتیا وزیر، ښاغلي مولوي نور جلال جلالي په هېواد کې په بشپړه توګه د پولیو ناروغۍ له منځه وړل خپل لومړیتوب وباله او ویې ویل، په سیمه کې د پولیو لیګیسي چیلنج اړوند بودیجه باید د روغتیايي خدمتونو په لومړیتوبونو مصرف شي؛ تر څو ټولو هېوادوالو ته اړین روغتیايي خدمات وړاندې او د پولیو په څېر ساري ناروغیو څخه مخنیوی وشي.
ښاغلي وزیر همداراز د پولیو واکسین کمپاین په کیفیت او په اغېزمنه توګه د هغه په تطبیق خبرې وکړې او د روغتیا نړیوال سازمان له مسؤلینو یې وغوښتل، چې دې برخې ته لا زیاته پاملرنه وکړي.
بل لور د روغتیا نړیوال سازمان استازو د پولیو د اغېزمن تطبیق برخه کې د بشپړې پاملرنې او بېلا بېلو برخو کې د همکارۍ ډاډ څرګند کړ.
