د عامې روغتیا وزارت له لوري د لاسونو مینځولو په موخه د عامه پوهاوي غونډه ترسره شوه
په دې غونډه کې د عامې روغتیا وزارت د روغتیایي خدمتونو وړاندې کولو مرستیال ښاغلي مولوي عبدالولي حقاني، د وزارت یو شمېر مرکزي رئیسانو، روغتیا نړیوال سازمان استازو او روغتیایي کارکوونکو ګډون درلود.
د روغتیایي خدمتونو وړاندې کولو مرستیال، د اسلام مبارک دین له نظره د پاکوالي اهمیت روښانه او ویې ویل: د لاسونو مینځل د ډېری ناروغیو، لکه نس ناستي، کولرا، سینه بغل او COVID-19 مخنیوی کوي.
ښاغلي مرستیال دغه راز، د لاسونو پاکوالي برخه کې د عامې روغتیا وزارت د اقداماتو په اړه معلومات وړاندې او له اړوندو مسؤلینو څخه یې وغوښتل، چې د عامې روغتیا وزارت لارښوونې په پام کې ونیسي او د لاسونو مینځلو دود ته وده ورکړي؛ ترڅو له دې لارې د ناروغیو د لېږد مخه ونیول شي.
همدارنګه، د معالجوي طب لوی رئیس، ډاکټر وحدت الکوزي د لاسونو مینځلو ارزښت په اړه هر اړخیزه وینا ترسره او په روغتونونو کې یې د لاسونو مینځلو وسایلو پر برابرولو ټینګار وکړ؛ ترڅو د انتاني ناروغیو د خپرېدو مخنیوی وشي.
