د عامې روغتیا وزارت له لوري د حجاجو د روغتیایي معایناتو د بهیر همغږي
د ا.ا.ا د عامې روغتيا وزارت د روغتيايي خدمتونو وړاندې کولو مرستیال، ښاغلي مولوي عبدالولي حقاني د ۱۴۰۵ هـ ش کال حجاجو ته د روغتیایي خدماتو وړاندې کولو بهير کې د اسانتياوو په موخه د ولایتونو د عامې روغتیا ریاستونو له مسؤلینو سره آنلاین ناسته ترسره کړه:
په دې ناسته کې ښاغلي مولوي عبدالولي حقاني وویل، د سعودي عربستان له لوري ټاکل شويو مقرراتو ته باید په جدي توګه پاملرنه وشي او ټینګار یې وکړ، چې په هر ولایت کې باید ځانګړی ځای د حجاجو د منظمو روغتیایي معایناتو لپاره وټاکل شي.
همدارنګه هغه زیاته کړه، د معايناتو ټولې مرحلې باید په منظم ډول او د ټاکل شويو طرزالعملونو سره سم ترسره شي؛ تر څو حجاج له سفر مخکې د ښه روغتیایي وضعیت څخه برخمن وي او د هغوی د اعزام پروسه پرته له کومې ستونزې پر مخ ولاړه شي.
بل لور ولایتي مسؤلینو ډاډ ورکړ، چې ټول اصول، مقررات او ټاکل شوي طرزالعملونه به په بشپړ ډول عملي کړي او د حجاجو لپاره به د معیاري او منظمو روغتیایي خدماتو وړاندې کولو په موخه اړین اقدامات ترسره کړي.
