د عامې روغتیا وزارت د نظارت رئیس، ډاکټر کریم الله حلیمي او مل تخنیکي ټیم د GP مؤسسې له لوري د تمویلېدونکي روغتیایي مرکز څخه نظارت ترسره کړ
یاد نظارت، چې موخه یې د روغتیایي خدمتونو کیفیت لوړل، هېوادوالو ته په معیاري توګه د روغتیايي خدمتونو وړاندې کول او د چارو شفافیت دی، په ترڅ کې یې ډاکټر کریم الله حلیمي او مل تخنیکي ټیم د کابل ولایت ۱۳مې ناحیه، اتفاق شهرک کې له اساسي روغتیایي مرکز (BHC) څخه لیدنه وکړه، ستونزې او نیمګړتیاوې یې په نښه او د حل په موخه له اړوندو مسؤلینو سره شریکې کړې.
دغه راز، د نظارت رئیس د پروژې مسولینو ته وویل، چې له عامې روغتیا وزارت سره د شوې هوکړې له مخې معیاري او باکیفیته خدمات وړاندې کړي او روغتیايي کارکوونکو ته یې سپارښتنې وکړې، چې د ناروغانو ستونزو ته د رسېدنې او درملنې برخو کې لا زیاتې هڅې وکړي؛ تر څو خلکو ته لازم خدمات وړاندې شي.
د یادونې وړ ده، چې د GP مؤسسه د کابل ولایت ۱۳مې ناحیه، اتفاق شهرک اساسي روغتیایي مرکز (BHC) کې د مور او ماشوم د روغتیا، سوء تغذيې او OPD برخو کې د خدماتو وړاندې کولو مسؤلیت لري.
