د عامې روغتیا وزارت د مقام د دفتر لوی رئیس د کونړ زلزلهځپلو ټپیانو د درملنې وضعیت وڅېړ
د ا.ا.ا د عامې روغتیا وزارت د مقام د دفتر لوی رئیس، ښاغلي الحاج شیخ محمد طاهر حلیم او مل پلاوي د کونړ ولایت د تېرې ورځې زلزلې قربانیانو د درملنې او وضعیت ارزونې په موخه اسعدآباد ولایتي روغتون کې د داخل بستر ټپیانو څخه لیدنه وکړه
د دې لیدنې موخه د زلزلې قربانیانو ته په معیاري او سمه توګه رسېدنه او هغوی ته د مناسبو روغتیايي خدمتونو وړاندې کول وو، چې ترڅ کې یې د عامې روغتیا وزارت د مقام د دفتر لوی رئیس د روغتون مسؤلینو او روغتیایي کارکوونکو ته د ښو او پر وخت خدمتونو په ترسره کولو ټینګار وکړ.
سربېره پر دې، د دغه لیدنې پر مهال د یاد روغتون له مسئولینو سره د شته روغتیایي امکاناتو په اړه بحث او خبرې وشوې؛ تر څو ډاډ تر لاسه شي، چې ناروغانو ته ټول روغتیايي خدمتونه په ښه توګه او ټاکلي وخت تر سره کېږي.
د مقام د دفتر لوی رئیس د روغتیایي کارکوونکو د هڅو او ستړیاوو قدرداني وکړه او ورڅخه یې وغوښتل، چې خدمات باید لا معیاري او ټولو ته په منظم ډول وړاندې شي.
د یادولو وړ ده، چې ښاغلي حلیم د دې روغتون ادارې سره ژمنه وکړه، چې د یاد روغتون هر ډول اړتیاوو ته به د عامې روغتیا وزارت په وخت رسېدنه وکړي.
