د عامې روغتیا وزارت د روغتیایي خدمتونو وړاندې کولو معینیت کې د بېرته راستنېدونکو هېوادوالو لپاره د وړاندې کېدونکو روغتیايي خدمتونو د ښه والي په موخه غونډه ترسره شوه

په یاده غونډه کې د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني، د معالجوي طب لوی رئیس ډاکټر وحدت الکوزي، د روغتیا نړیوال سازمان، یونیسف، IOM ،AADA او RI مؤسسو استازو ګډون کړی و.

په دې غونډه کې راستنېدونکو هېوادوالو ته د وړاندې کېدونکو روغتیايي خدمتونو ښه والي، اسانتیاوو رامنځته کولو او شته ستونزو د حل په اړه بحث او خبرې ترسره او د مؤسسو استازو د عامې روغتیا وزارت سره د مرستو او همکارۍ ژمنه وکړه.

 د روغتیایي خدمتونو وړاندې کولو مرستیال، پر لا زیاتې همغږۍ او د اړتیا سره سم د موبایل ټیمونو پر زیاتوالي ټینګار وکړ؛ تر څو د بېرته راستنېدونکو هېوادوالو ستونزو ته پر وخت رسېدنه وشي.

دغه راز، ښاغلي مرستیال د ناروغیو د خپرېدو مخنیوي په موخه د حفظ الصحې مراعتولو او د واکنیشین او سکریننګ سیسټمونو د لا تقویه کولو په اړه لازمې سپارښتنې وکړې او له اړوندو مسؤلینو یې وغوښتل، چې خپلو مسؤلیتونو ته لا زیاته پاملرنه وکړي.