د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني د شواهدو پر بنسټ د نشه یي توکو د درملنې او بیارغونې د خدماتو په اړه د درې ورځني ورکشاپ پرانسته ترسره کړه
دغه ورکشاپ چې د ناروغیو د کنټرول او مخنیوي لوی ریاست له لوري جوړ شوی و، په کې د عامې روغتیا وزارت د روغتیایي خدمتونو وړاندې کولو مرستیال ښاغلي مولوي عبدالولي حقاني، د ناروغیو د کنټرول او مخنیوي ریاست سرپرست ډاکټر محمد ظاهر منګل، د وزارت د اړوندو ریاستونو مسؤلینو، افغانستان کې د ساري ناروغیو (ایډز او هیپټایټس) د کنټرول ملي پروګرام مسؤل ډاکټر عبدالرحمن شرین دل او د کورنیو چارو وزارت د نشه یي توکو پر وړاندې د مبارزې معینیت مرکزي او ولایتي کارکوونکو ګډون درلود.
د عامې روغتیا وزارت د روغتیایي خدمتونو وړاندې کولو مرستیال، یاد ورکشاپ د نشه یي توکو د مخنیوي برخه کې مهم وباله او د نشه یي توکو پر وړاندې یې د اغېزمنې مبارزې لپاره په خپلمنځي همغږۍ او همکارۍ ټینګار وکړ.
ښاغلي مرستیال همداراز، د نشه یي توکو پر وړاندې د مبارزې پیاوړتیا لپاره د کورنیو چارو وزارت او نړیوالو بنسټونو ملاتړ او همکاري اړینه وبلـلــه، تر څو د روږدو ناروغانو لپاره اغېزمن او د لاس رسي وړ خدمات ترسره شي.
یاد ورکشاپ چې د نشه یي توکو پر وړاندې د مبارزې مرکزي او ولایتي کارکوونکو لپاره جوړ شوی و، په کې د نشه یي توکو د ضررونو، مخنیوي، روږدو ناروغانو درملنې او د نشه یي توکو د زرقي استعمال له لارې د خطرناکو ساري ناروغیو د انتقال په اړه هر اړخیز پریزینټېشنونه وړاندې شول.
