د عامې روغتیا وزارت د روغتیايي پراختیا او پالیسۍ د ملي کمېټې ناسته ترسره شوه
یاده ناسته د عامې روغتیا وزارت د پلان ریاست د راپور ورکولو د برخې متخصص ډاکتر عبدالعظیم احمدزي، د عامې روغتیا وزارت تخنیکي مسؤلینو، د روغتیا نړیوال سازمان، ملګرو ملتونو د وګړو صندوق او یونیسف ادارې د استازو په شتون کې ترسره شوه.
په دې ناسته کې ګډونوالو د روغتیا سکتور پراختیايي بهیر او د پالیسۍ پخوانی پلان وڅېړه او د هغه د ښه والي، تطبیق او وروستي کولو په موخه یې خپل نظرونه او وړاندیزونه له یو بل سره شریک کړل.
د دې غونډې په ترڅ کې پرېکړه وشوه، چې د روغتیا سکتور د پراختیايي پلان او پالیسۍ د تطبیق اړوند ادارې چې په دې برخه کې مسؤلیت لري باید خپلې چارې ګړندۍ کړي؛ تر څو په راتلونکو درې میاشتو کې د یاد پلان چارې بشپړې او تطبیق شي.
