د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني د لپراسکوپي جراحي د لومړۍ دورې فراغت غونډه کې ګډون وکړ
یاده غونډه چې د استقلال ملي او تخصصي روغتون په نوښت د لپراسکوپي جراحي څانګې څخه د ۲۰ تنو متخصصو ډاکټرانو د فراغت په ویاړ جوړه شوې وه، په کې د عامې روغتیا وزارت یو شمېر مرکزي رئیسانو، د استقلال روغتون رئیس او متخصصو ډاکټرانو ګډون درلود.
د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني فارغ شویو ډاکټرانو ته د فراغت مبارکي وکړه او د لپراسکوپي جراحي برخه کې یې دغه پرمختګ ستر ویاړ وباله.
دغه راز، ښاغلي مرستیال وویل، عامې روغتیا وزارت به د روغتیایي کارکوونکو د ظرفیت لوړونې پروګرامونو د لا پرختیا، د خدماتو د کیفیت ښه والي او لرې پرتو سیمو ته د خدماتو رسولو لپاره خپلو هڅو ته دوام ورکړي؛ ترڅو د خلکو روغتیایي ستونزې په کور دننه حل او ورته لازمې اسانتیاوې رامنځته شي.
