د عامې روغتیا وزارت د خصوصي سکټور همغږۍ او تنظیم رئیس، ډاکټر احمد خندان د هندوستان روغتیايي سکټور له متخصصینو او سوداګرو سره لیدنه ترسره کړه
په دې لیدنه کې هندي پلاوي د روغتیا سیستم او زیربناوو عصري کولو، نړیوالو معیارونو سره سم د کیفیت لرونکو روغتیايي خدماتو چمتو کولو، د مسلکي کارکوونکو ظرفیت لوړولو او د درملو او طبي تجهیزاتو تولید برخو کې د پانګونې په موخه خپلې طرحې او پلانونه د خصوصي سکټور همغږۍ او تنظیم له رئیس سره شریکې او په دې برخه کې د عامې روغتیا وزارت څخه د ملاتړ غوښتونکي شول.
د خصوصي سکټور د همغږۍ او تنظیم رئیس هندي پلاوي ته د ښه راغلاست ترڅنګ وویل: دا ناسته زموږ د ادارې لپاره یو ښه فرصت دی، موږ نه یوازې ستاسې د طرحو او پلانونو ملاتړ کوو؛ بلکې موږ هڅه کړې چې د روغتیايي سیستم پیاوړتیا لپاره د هندوستان هېواد له تجربو څخه ګټه واخلو او د خپل هېواد روغتیايي سیستم د پیاوړتیا او عمومي هوساینې لپاره د یاد هېواد فعالیتونه یوه بریالۍ بېلګه ګڼو.
