د عامې روغتیا وزارت او UNODC ترمنځ د نشهيي توکو د مخنیوي په برخه کې د همکاریو پر پراخولو ټینګار
د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني په خپل کاري دفتر کې د UNODC دفتر له عملیاتي رئیس ښاغلي بو متیايسن او افغانستان کې د یاد دفتر له مشر پولیک اوک سیري سره لیدنه وکړه
په دې لیدنه کې چې پر مهال یې د عامې روغتیا وزارت د ساري ناروغیو د کنټرول او مخنیوي لوی رئیس، ډاکټر حیدر خان حیدر هم شتون درلود، د روغتیایي خدمتونو وړاندې کولو مرستیال د ملګرو ملتونو د نشه یي توکو او جرمونو پر وړاندې د مبارزې دفتر (UNODC) له همېشنۍ همکارۍ او همغږۍ مننه وکړه او د نشه یي توکو د مخنیوي برخه کې یې د یاد دفتر رول مهم وباله.
دغه راز، ښاغلي مرستیال د UNODC دفتر له عملیاتي رئیس، ښاغلي بو متیايسن څخه د نشه یي توکو د مخنیوي برخه کې د لا زیاتې همکارۍ او همغږۍ غوښتنه وکړه.
بل لور د UNODC دفتر عملیاتي رئیس ښاغلي بو متیايسن (BO Mathiasen) د نشه یي توکو د مخنیوي برخه کې د عامې روغتیا وزارت هڅې وستایلې او ژمنه یې وکړ، چې د عامې روغتیا وزارت سره په همغږۍ به یاده برخه کې خپلو هڅو دوام ورکړي.
