د افغانستان لپاره د حادې خوارځواکۍ د مدغمو اهتماماتو ملي لارښود د بیا کتنې دوهم ورکشاپ ترسره شو

د عامې روغتیا وزارت د عامه تغذیې ریاست له لوري د ملي او نړیوالو شریکانو په همکارۍ د افغانستان لپاره د حادې خوارځواکۍ د مدغمو اهتماماتو ملي لارښود د بیا کتنې دوهم ورکشاپ ترسره شو، چې په کې د عامې روغتیا وزارت د عامه تغذیې ریاست مسؤلینو، د روغتیا نړیوال سازمان، یونیسف، WFP  استازو او روغتیایي کارکوونکو ګډون کړی و.

یاد ورکشاپ د خدمتونو د کیفیت لوړولو، د شفافو او همغږو کړنلارو رامنځته کولو او ملي لارښود د پیاوړتیا په موخه ترسره شو، چې په کې د حادې خوارځواکۍ د درملنې او مخنیوي پر اوسني حالت، موجوده ستونزو او پر هغه علمي او تخنیکي بدلونونو بحث وشو، چې د لارښود په راتلونکې نسخه کې شامل شي؛ تر څو د هېواد له شرایطو سره اړخ ولګوي او د خوارځواکۍ پر وړاندې مبارزه اغېزمنه شي.

د عامې روغتیا وزارت د عامه تغذیې رئیس، ډاکټر حکمت الله معصومي دغه ورکشاپ د ملي لارښو (Guideline) د تقویت لپاره مهم او اغېزناک وباله او د ګډونوالو له هڅو او همکارۍ یې مننه وکړه.