د اتاترک ملي او تخصصي روغتون ته د ۳۵ مېلیونه افغانیو په ارزښت روغتیايي وسایل واخیستل شول او د دې روغتون لس روغتیايي څانګې ترمیم او نوې جوړې شوې
د عامې روغتیا وزارت له لوري په کابل کې د اتاترک ملي او تخصصي روغتون ته د ۳۵ مېلیونه افغانیو په ارزښت روغتیايي وسایل واخیستل شول او د دې روغتون لس روغتیايي څانګې ترمیم او نوې جوړې شوې.
نن سه شنبه د جمادي الثاني ۱۷ نېټه د عامې روغتيا وزارت مالي او اداري معين ښاغلي مولوي محمد اسحق صاحبزاده، د ترکيې هېواد د سفارت مرستیال امري مانف، د روغتیا نړيوال سازمان مسؤولینو، د اغا خان بنسټ اجرايوي رئيس، ډاکټر نصرالله اوريا، یو شمېر روغتيايي مسؤولینو او روغتياپالانو په شتون کې رسماً د نویو جوړو شویو څانګو پرانسته تر سره شوه.
د عامې روغتیا وزارت مالي او اداري معین یادو مراسمو ته د وینا پر مهال وویل: ( د عامې روغتیا وزارت هوډ لري چې د روغتیا په برخه کې به لا ډېر پرمختګونه وشي، روغتیايي خدمات به لا معیاري او روغتیايي برخه کې به ستر بدلون راشي.)
د ترکیې د سفیر مرستیال یادو مراسمو ته د وینا پرمهال د ترکیې هېواد د مرستو پر دوام ټینګار وکړ او د افغانستان سره یې خپلې اړیکې دوستانه او د ډېرې مخینې درلودونکې وبللې.
همدارنګه نورو ويناوالو هم په هېواد کې د روغتيايي خدماتو په اړه خپل نظرونه وړاندې کړل او لا ژمنتيا يې څرګنده کړه چې روغتيايي خدمات به معياري لور ته وړل کېږي.
