د تخار ولایت په دشت قلعه او بهارک ولسوالیو کې د دولتي او خصوصي روغتیایي سکټور څخه نظارت تر سره شو
د تخار د عامې روغتیا ریاست د څارنې او پلټڼې ټیم د دغه ولایت د عامې روغتیا رئیس، ډاکټر محمد ولي "احمدزي" په شتون کې د دې ولایت په دشت قلعه او بهارک ولسوالیو کې د دولتي او خصوصي روغتیایي سکټور بېلا بېلو برخو څخه نظارت تر سره کړ.
مسؤلینو د دې نظارت په ترڅ کې په روغتونونو، کلینیکونو، کتنځایونو او درملتونونو کې د روغتیايي کارکوونکو له کاري فعالیتونو څخه لیدنه وکړه، چې پایله کې یې د غیر قانوني لوحو د اصلاح او تنظیم او د مسلک خلاف د معایناتو ترسره کولو برخه کې اړینې لارښوونې وشوې او یو شمېر کتنځایونه، چې د طب مسلک او تحصیلي څانګې خلاف یې فعالیت تر سره کو، وتړل شول.
همدارنګه له نیم ټن څخه زیات له نېټې تېر او بې کیفیته درمل، چې د نظارتي ټیم له لوري راټول شوي وو، د یاد هیئت په شتون کې له منځه یوړل شول.
