د ا.ا.ا د عامې روغتیا وزیر، ښاغلي مولوي نور جلال جلالي په خپل کاري دفتر کې د افغانستان لپاره د (UNDP) سازمان له مشر، ښاغلي سټیفن روډرېک سره وکتل
په دې لیدنه کې د روغتیايي مرکزونو لپاره د لمریزې برېښنا سیسټم جوړولو پر همغږۍ، د مراکزو د انتخاب پر څرنګوالي، د ملاریا، توبرکلوز او اېچ آی وي ناروغیو د مخنیوي، د اړوندو روغتیايي خدماتو د بیا کتنې او شفافیت په اړه بحث او خبرې ترسره شوې.
د عامې روغتیا وزیر، ښاغلي مولوي نور جلال جلالي د یاد سازمان له همکارۍ څخه په مننې د لرې پرتو سیمو لپاره د روغتیايي خدماتو، د اړمنو سیمو او روغتیايي مرکزونو لپاره د لمریزې برېښنا سیسټم جوړولو او د ساري ناروغیو په کنټرول کې د یو این ډي پي همکاري او همغږي اړینه وګڼله او په ټولو خدماتو کې یې د شفافیت او حساب ورکوونې اصل په نظر کې نیولو سره د خدماتو وړاندې کول اغېزمن وبلل.
دغه راز، د یو این ډي پي سازمان مشر شفافیت او حساب ورکوونه خپل لمړیتوب وباله او په وینا یې د افغانستان روغتیايي سیسټم سره به په دوامداره توګه همکار اوسي.
